Nuka Alice Sisimiuni atuakkiaminik saqqummersitsivoq.

Ullumikkut qilaatersortartutut, inngertartutut kulturitsinnillu aallussilluartutut ilisarisimaneqarluartup Nuka Alicep inngerusiani, nuutitalersukkat kiisalu eqqumiitsuliortup pikkorilluinnartup Bolatta Silis-Høeghip qalipagaanik assitalersukkat tallimanngorneq 18. April 2025 atuaganngorlugit saqqummersippai.

Inngerutit tamarmik immikkut oqaluttuassartaqartarput, taakkualu atuakkami aamma ilanngullugit oqaluttuarineqarput. Atuagaq eqqumiitsuliortorpalaartumik suliaavoq kusanartumik qeratasuumik ungaloqarluni, qalipaatilimmik naqitaalluni kikkunnilluunniillu tamanit atuarneqarsinnaalluni.

Atuagaq 68-inik qupperneqartoq inngerneq pillugu aamma kulturitsinnik alapernaatsunut, inngertalerusuttunut, inngernerup oqaluttuassartaanik isumaanillu paasisimasaqalerusuttunut, anersaakkut immersorneqarusuttunut, eqqumiitsulianik nuannarisaqartunut, nuutersorluni erinarsortartunut erinarsoqatigiinnullu naleqquppoq.

Atuakkiorngaaq Nuka Alice atuakkamik saqqummersitsilernini ima oqaasertalerpaa: “Ingioqatigiilluta inngertarnerput uterteqqikkusullugu inngerutit nammineq allallu peqatigalugit pitsiagut tamanit atorneqarsinnaasunngortikkumallugit una atuagaq pilersippara”.

Nuka Alicep saqqummersitsisarfik Iperaq peqatigalugu atuagaq piviusunngortippaa. Atuakkamik ilioqqaasuuvoq Arnajaraq Støvlbæk nuutitaanillu suliarinnittuulluni Line Groth Riis. Atuagaq kalaallisut tuluttullu saqqummersinneqassaaq Iperarlu aqqutigalugu piniarneqarsinnaalereerluni.

Atuakkamik saqqummersitsinermut atatillugu atuakkamut kusanaqisunik assiliartalersuisoq Bolatta Silis-Høegh.

Atuakkap piviusunngortinneqarnissaanut tapiisut pingaarnerit tassaapput Namminersorlutik Oqartussani Tipsernermik Lottornermillu Aningaasaateqarfik aamma Eqqumiitsuliornermut Aningaasaateqarfik.